رغايف (المسمن) بالكفتة

رغايف بالكفتة

المقادير:

500غ كفتة ,بصلة ,تومة ,الربيع ,

التوابل : التحميرة ,البزار ,سكنجبير والخرقوم .

للي بغات تزيد القرفة او الكامون ...

2 الى 3 معالق كبار مطيشة الحك .

وكنحتاجوا كذالك جبن ابيض نفرتوه بيدينا اونحكوه في الحكاكة الجهة الغليضة,

بيضة,نصف كاس او نصف طاسة حليب سائل,2او3معالق كبار الزيت عادي.شوية البزار والتحميرة اختياري للون فقط وماعملتش الملح حيت الجبن مالح. 

الطريقة:

هه نسيت الورقة اي نوع غليض اورقيق ماشي مهم 500غ.

كنشحروا الكفتة-بلا زيت كافي الدهن للي فيها-ونحلوها مزيان ثم نزيدوا البصلة والتومة الربيع مقطعين صغار نشحروهم مزيان ونزيدوا عليهم التوابل.نطفيوا عليها ونخليوها تبرد.

ناخدوا المقادير التانية ونخلطوهم في شي طبسيل ماعدا الجبن!.

ناخدوا طبق الفرن يكون غارق ندهنوه بشوية الزيت ثم نقسموا الورقة على 3-عشوائيا-.

نفرشوا الجزء ١ من الورقة ثم نصبوا فوقه شوية من الخليط ديال البيض ونسرحوه -انا كنستعمل يدي-ثم ناخدوا جزء١ من الكفتة -نقسموا الكفتة على ٢- نسرحوه على الورقة ثم نفرتوا فوقها الجبن ثم نعاودوا العملية مرة اخرى يعني جزء٢ ورقة نفزكوها بالخليط ثم الكفتة ثم الجبن صافي يبقى لنا الجزء3من الورقة نغطيوا بيه ونصبوا فوقه باقي الخليط للي شاط ثم ندخوها الفرن مسخن على درجة 200 مدة 20د حتى يتحمر الوجه ونخرجوها حتى تبرد ونقطعوها ههه انا كنفصلها مسكينة بالمقص كيجيني اسهل !. 

اقتراحات :

مرات كنعملها غير بجبن feta محكوك بوحدوا او مرات بالسبانخ او مرات بالبوروا مممم كتجي لذيذة.

ممكن اي جبن ابيض ماشي ضروري للي في الصورة حتى feta كيجي غزال.

حاولوا تكون الورقة قد قياس الطبق او طويوها المهم خبيوا العيب الداخل باش منضرها يجي من الفوق متساوي.

-كذالك ممكن نستعملوا اوراق الثريد تكون رقيقة .